تعطير المنزل و انواع البخور المفضله

((( بسم الله الرحمن الرحيم ))

كيفكم بنات 

تدوينه اليوم عن البخور الي استخدمه و طريقه تعطير المنزل 

انواع المعطرات المنزليه ..

العود الازرق او الكمبودي ، خشب عود مشبع بالعطور ،

 معمول معطر ، فواحات عطريه ، معطرات جويه .

راح اتكلم بالترتيب عن الي موجودين بالصوره كلهم 

وبعدها راح اكتب طريقتي في التبخير و التعطير .

معطر الجو " glade " لتعطير الهواء و الاقمشه 

انا انسانه اكره معطرات الجو ،، لانها تتعبني و تكتمني من المواد الي يحطونها 

عشان تخلي ريحة العطر فواحه .

ماعدا هالنوع الي بالصوره لي اكثر من ٣ سنين و انا استخدمه 

الروائح بـ انواعها كلها للطيفه .. وماتكتم ابداً .

اكثر ريحه احبها هي 

fresh mountain morning 
وهو اول واحد يسار الصوره .

العود عشقي بكل انواعه 

اعشق ريحته الفخمه و يذكرني بـ الاعياد و العزايم و الافراح بشكل عام .

وانا اكتب لكم تذكرت ريحته مع القهوه واااه ياقلبي :( 

جربت انواع كثيره كل نوع يتميز عن الثاني بشي ..

من اكثر الانواع الي انا اعشقها و ريحته ثابته في البيت بشكل خيالي 

يعني تجلس بالايام و توصل لـ اكثر من اسبوع .

النوع الاول :

هو عود كنام

 من عبدالصمد القرشي ،، عجيب و تميزي ريحته من قبل تبخرين فيه يعني اذا شميتي الخشب تميزينه .. من ريحته الخارجيه .

سعره ناسيته بس اعتقد الوقيه ٣٠ جرام ب ٥ الاف .

النوع الثاني :

اسمه كيارا 

ومن عبدالصمد القرشي ،، ريحته فخمه ومرره مميزه و ثباته ممتاز بالبيت 

بس مو زي عود كنام .

سعر الوقيه ٣٠ جرام بـ ٣ الاف .

ع بالي صورته لكن طلع الي مصورته مو هو فا ما امدآني اصوره ثاني .

النوع الثالث :

اسمه دقه ملكي او حجازي 

شي من كذا .

طبعاً هو مرره صغير و مكسر ، عباره عن بقايا انواع البخور 

يعني انواع كثيره من البقايا مجمعينها .

اذا تحبي العود الازرق 

هاذا يصلح لكل يوم .. بس الريحه مو مره فاخره و ثابته 
يعني حده يومين .

الوقيه سعرها ٦٠٠ ريال 

النوع الرابع :

اخذته من الماجد ، ما اعرف ايش نوعه 

رأي عنه 

ثباته متوسط وفوحانه جيد اذا ميزانيتك اقل من ٥٠٠ ريال 

لانه اعتقد اخذت الـ ٣٠ جرام بـ ٣٠٠ ريال .

نجي للعود المعطر 

الي بالصوره كلهم اعشششششقهم 

من اليمين :

عود العنبر من الجزيره للعطور 

جمييل جدا وريحته مميزه ويصلح للعزايم ،، و استخدمه من اول مافتح محل الجزيره ببانوراما مول 

بس الفتره الاخيره احس تركيز ريحة العنبر فيه مو زي قبل :(

سعره اعتقد ٢٠٠ ريال 

البخور الي بالوسط :

جايبور عتيق " ورد الطائف "

هالشي يجنننن مره وريحته تهبل مع انه معمول ،، و بالنسبه لي 

ماحب المعمول لانه غالباً يجي فيه ريحه خشب محروق 

بس هاذا غير وما احس بـ ازعاج وقت ما ابخر فيه .

من نفس المجموعه في عنبر للون علبته ازرق 

مره يجنن و ريحته حلوه كمان ،، نسيت اصوره للاسف :( 

استخدمهم لكل يوم ومايصلحون للمناسبات .
اسعارهم ٢٠٠ ريال للعلبه من عبدالصمد القرشي .

اخر عود و هو الي بالاخير :

اسمه 

عود بخور معطر ملكي 

بالعنبر 

هالشي عجييييب و ريحته عنبر فخمه ومره فواحه 

وفخمه .

يصلح تبخري فيه البيت بوقت العزايم او بدون .

من عبد الصمد و ناسيه سعره .

الفواحات العطريه 

جربت كثييير براندات ،، اكثر شي عجبني 

هي ديورانس 

فوحاتهم تجنننن و خفيفه وفيه منها انواع كثيره 

 احب الافندر حقهم لانه ريحته لافندر لافندر و مو اي شي :)  و فواحه ثانيه 

ناسيه اسمها مخلصه من عندي ،، ريحتها نفس ريحة الفكس و تذكرني بالسبآ .

و اشتري منهم وقت التخفيض واعتقد حالياً عندهم تخفيض .

 صناعتها فرنسيه .

بالاخير طريقتي في تثبيت 

الروائح العطريه او البخور .

هو اني ارش البخاخ المعطر الي موجود بـ اول الصوره ع الاثاث .

و ابخر بعده ع طول بالعود او البخور .

الريحه تثبت اكثر لانه .. الروائح بشكل عام تثبت ع الاماكن الرطبه .

...

انتهى و ان شاء الله عجبتكم التدوينه :) 

أساس كابتشر توتال من ديور

كيفكم بنات ..

اليوم بتكلم عن اساس كابتشر توتال من ديور 

هو عباره عن سيروم و اساس .

المنتج يوعدك بـ انه :

* اساس سائل معالج ومجدد للبشره  .

* فيه نسبه حمايه من اشعه الشمس ٢٥ .

* قوامه مخملي و يعطي مظهر صحي .

* ثبات طويل الامد غير مرئي .

* يحافظ على ليونه وترطيب البشره .

* يعطي مظهر ناعم للبشره و اكثر شباباً .

تجربتي مع المنتج :

بالبدايه المنتج ينصح فيه للبشرات المتقدمه في العمر 

و بصراحه مررره يناسبهم بحكم اني جربته لبشرات متقدمه بالعمر .. مرره مايبين التجاعيد

ولا يتجمع حول الخطوط .. و يعطي البشره نداوه ونعومه .

بالنسبه لي اثناء الاستخدام ما كأني مستخدمه اساس مرره 

خفيييف من ناحيه ثقله ع البشره .

يعطي مظهر مات صحي مو مات مغبر :) .

ثباته مرره عاااالي و من كثر مو هو خفيف ع البشره تنسي انه ع بشرتك اساس .

التغطيه من متوسطه الى عاليه 

الي مجربه اساس دولتشي المات .. فا هاذا تغطيته اقل بدرجتين .

 يعطي ترطيب عالي فا هـ الاساس مثالي للبشره الجافه .

 مناسب للاستخدام اليومي وما يضر البشره بس طبعاً لاتنسو الازاله قبل النوم بمزيل المكياج .

 يناسب كل انواع البشرات .

 حلو للتصوير ومايبن اي شوائب و استخدمته في مناسبات كبيره .

طريقه توزيعه :

توزعينه بفرشه الاساس بـ اتجاه واحد .. خارج البشره مثلاً 

وبعدين تطبطبي بـ البيوتي بلاندر .

عيوب المنتج :

سعره المرتفع و كميته القليله ٣٠ مل 

اذا بشرتك دهنيه راح يدهن معاكي بشكل بسيط في المناطق الدهنيه .

درجاته مو متنوعه و قليله .

راح ارجع اشتريه او لا ..

اي اكيد راح ارجع اشتريه مع انه سعره مرتفع نوعا ما 

بس ماعندي شي اغلا من بشرتي :)

سعره ٤١٠ ريال 

من سيفورا اشتريته 

راح تلاقينه كمان في وجوه ودبنهامز و فافافوم 

انتهى ..

GiveAway لمتابعاتي في الانستقرام

سلام بنات 

كيفكم 

اخيراً 

هديه مقدمه مني ومن متجر الجميله جوري حبيبه قلبي

@aljorys.luxury 

لمتابعاتي في الانستقرام 

الهديه عباره عن :

* ماسكات من نيفيا و بيزلين و ماسك الشوكلاته من فارم هاوس .

* مزيل مناكيرر من سيفورا لليدين و الاقدام .

* منتج تسمير مؤقت للجسم .

* كونتور بودر من ايلف .

* كونتور باودر من سيليك .

* بلاشر كريمي من ايلف .

* جل وبودره حواجب من ايلف .

* برايمر توب كلر .

* مجموعه احمر خدود من توب كلر .

* كحل اسود من سيفورا .

* مجموعه شادوهات من سيفورا .

* مجموعه شادوهات من ميك اب جيك .

* باليت حصري من لوراك .

* ماسكارا من سيفورا .

*بخاخ مثبت للمكياج من ايلف .

* مجموعه ارواج مات من نيكس .

* روج مات من كلورد رين .

شروط المسابقه :

١/ تكوني اكيييد من متابعاتي ومتابعات حساب جوري في الانستقرام .

٢/ تنزلي صوره بوست اعلان الهديه الموجوده في الانستقرام في حسابك 

و تسوين منشن لحسابي و منشن لحساب جوري 

مع تاق فقط لحساب جوري .

٣/ تستخدمي هاشتاق #SultanaGiveAway

٤/ المشاركات مرفوضه من الحسابات المهتمه في المسابقات .

٥/ السحب ان شاء الله راح يكون بعد اسبوعين .

بالتوفيق للجميع ..

اساس ميك اب فورايفر الترا HD الجديد

قبل فتره وصلني هـ المنتجين من ميك اب فورايفر 

وجربتهم خلال هـ المده وبخبركم عن رأي ..

بس قبل بتكلم شوي عن هـ الاساس 

الاساس متطور جداً :) مناسب جداً للتصوير ، قوامه سائل ، يناسب كل انواع البشرات ، تغطيته غير مرئيه يعني ما كأنك 

مستخدمه اساس ابداً .

يخلي البشره تتنفس ولا يكتمها ، يعطي مظهر نهائي طبيعي جداً ، تغطيته خفيفه و طبيعيه .

..

* بشرتي مختلطه ،، الفتره الاخيره كان فيها قشور 

و اثناء استخدام الاساس كانت توضح وهذا الشي السلبي الي لاحظته ،، يعني ضروري تقشري بشرتك قبل الاستخدام .

* حبيت انه اثناء ما استخدمه ،، انسى انه ع وجهي اساس من كثر ماهو خفيف ولايكتم .

* الاساس مثالي للاستخدام اليومي ،، بما انه خفيف مايضر البشره و تغطيته طبيعيه .

* مايصلح للمناسبات الا اذا بشرتك مثاليه ومافيها اثار حبوب ،، بـ هـ الحاله تقدري تستخدميه

و جداً راح يعجبك .

* صح يابنات هو يعطي تغطيه خفيفه حلوه ومو بطاله ،، لكن مايخفي اثار الحبوب .

* مايخلي الوجه يدهن او شي من كذا ابداً .

* تدرجات للون الاساس جداً واسعه .

* نسبه ثباته ع البشره ممتازه ،، مايتحرك او شي من كذا ابداً .

..

طريقه الاستخدام :

لاحظت نقطه مرررره مهمه ،، انه مايصلح تستخدمي معاه اي بودره ثانيه ،، ماعرف ليه 

احس يتغير و يسير باهت ماعدا بودره الـ HD راح انزل صورتها اسفل .

مهم اثناء توزيع الاساس ،، توزعينه على اتجاه واحد ومن دون فرك او بشكل دائري .

افضل الفرش لتوزيعه هي فرش ميك اب فورايفر و ارقمهم 108 و 106 

هـ الفرشتين عجييييبين و سبق وتكلمت عنهم بالمدونه .

بعد ماتوزعينه بـ اتجاه واحد ،، طبطبي بـ استخدام البيوتي بلاندر .

بودره الـ HD الشفافه 

لتثبيت الاساس .

عجيبه غريبه هـ البوده ،، ماتتخيلو قد ايش هي خفييييييفه مع انها مضغوطه مو منثوره .

للونها ابيض شفااف ،، تثبيتها للاساس رائع .

طريقه استخدمي لها :

بفرشه منفوشه اوزعها ع الاماكن الي احب اثبت فيها الاساس عن طريق الطبطبه 

وبعد كذا اشيل الزايد من بشرتي بفرشه ثانيه نظيفه .

..

راح احدث التدوينه واحط لكم الاسعار لانه حالياً مو متأكده منها 

و

المنتجات تلاقونها بسيفورا او وجوه او دبنهامز او بوتيك ميك اب فورايفر .

الي جربت الاساس او البودره تكت تجربتها :) 

Etro event

(( بسم الله الرحمن الرحيم ))

قبل اسبوعين حضرت ايفينت لـ ماركه إيترو 

في بوتيكهم المتواجد في مركز المملكه بالرياض ..

و ع فكره انا مرره سعيده بهذا الايفينت لانه انا اساساً مرره احب إيترو 

وتعجبني فساتينهم لانه نقشتها متميزه .

بتكلم عن نشئه ماركه إيترو 

ابتدت إيترو عام ١٩٦٨ على يد المؤسس جيمو إيترو ،، وكانت في بدايتها 

تصنع الاقمشه الراقيه و تطور وضع إيترو الى ان سارت تنتج ملابس نسائيه 

و ملابس رجاليه و عطور .

كل منتجات إيترو تحمل نقشه " البيزلي "

وكمان عندهم انتاج خاص بـ المنزل تعرفت عليه قبل كم سنه اثناء سفري خارج المملكه ..

و بصراحه مرره جذبني و حبيته وطبعاً اغلب منتاجتهم للمنزل يغلب عليه الزخازف الخاصه بـ إيترو .

خلال الايفينت ،، كان متواجد صانع حقائب و يعرض لنا طريقه صنع حقائب إيترو بـ كامل التفاصيل 

شي ممتع صراحه انه يكون بـ الايفينت جزء تطبيقي وحي .



تعرفت كمان ع الكولكشن الاخير الي متواجد بالبوتيك ..

و تعرفت اكثر على بدايات أيترو زي ما ذكرت فوق .. و على تفاصيل نقشاتهم المميزه .

و على فكره ،، فساتينهم اكثر مايميزها 

انه اغلبها اكمامها طويله 

وهذا الي يعجبني بما اني مره احب الكم الطويل :)

خلال تواجدي بالبوتيك صورت لكم اكثر القطع الي عجبتني 

فا بعرض لكم صورها ..

جداً حبييييت هـ الشنطه ،، و طبعاً للونها مرره عجيب 

الشنطه حجمها كبير 

ومتوفر منها هـ الحجم بـ هـ اللونييين
الحمرااء مره تهبل 

الكلاتش هذا للونه فوشي ،، حجمه مره حلو 

وسعره حلو .

الشوز مرره انيق ..

الجزم الرياضيه 

جد اتميزو في تصميمها و سعرها مره كان مناسب .

من فساتين الكولكشن الاخير
حبييييته و سعره حلو 

الوان الفستان غريبه و خريفيه 

موفرين اكسسوارات 
ومنها للشعر ..







..
...

(( اسفل راح اخذكم في جوله بالبوتيك ))

الكولكشن الرجالي حاضر :)

و بـ الاخير

اخذت من إيترو هـ الشنطه 
عمليه و خفيفه 
سعرها 3700 ريال 


فروع ايترو 
في الرياض .. المملكه 
في جده .. مركز الخياط 
في الخبر .. الراشد مول 






..
...

شكراً لكل القائمين على الايفنت .. 
و شكراً ع الهديه الجميله